Ang lalawigan ng Marinduque ay ang tinaguriang puso ng
Pilipinas. Maliban sa pagiging hugis puso nito, ay dito matatagpuan ang Luzon
Datum kung saan ay ito ang tinatayang pinakapusod ng bansa. Nabibilang ang lalawigang
ito sa Region IV-B MIMAROPA (Mindoro Oriental, Occidental, Marinduque, Romblon
at Palawan). Ang topograpiya o lunan ng lalawigan ay binubuo ng kapatagan at
kabundukan na ang hantungan ay ang karagatan sapagkat ito ay isang lalawigang
isla. Mararating ang lalawigan ng Marinduque sa pamamagitan ng paglalakbay sa
dagat at maaari ding sa panghimpapawid na sasakyan. Ito ay binubuo ng anim na
bayan, ang Boac na siyang kabisera ng lalawigan, ang Buenavista, Gasan, Mogpog,
Sta. Cruz, at Torrijos at may kabuuang bilang ng humigit kumulang sa 250,000 na
mamamayan, sang-ayon sa ginawang census ng populasyon nuong 2007.
Ang Marinduque ay
nabibilang sa 4th class na probinsiya at mararating ng isang
manlalakbay ang lahat ng mga bayan ng lalawigan sa loob ng apat hanggang anim
na oras sa mga ordinaryong paraan ng paglalakbay sa dyip. Mayaman sa kalikasan
ang lalawigan sa katunayan ay napatanyag ito sa pagmimina ng copper subalit sa
hindi inaasahang pangyayari ang mine tailings spill na nangyari sa minahan ang
siyang naging sanhi ng pagkamatay ng Ilog ng Boac at ito ay ipinasara at hindi
na muling binuksan. Mayaman din ang lalawigan sa mga biyaya mula sa karagatan
at sa kabundukan. Mahigpit ang mga batas na ipinasa upang mapangalagaan ang mga
likas yamang ito.
Sa kalagayang
pangkalakalan at ekonomiya, ang lupain ng lalawigan ay nakatuon sa pang
agrikulturang mga gawain. Pagsasaka at
pangingisda ang mga pangunahing pinagkukunan ng pagkakakitaan at ikinabubuhay
ng mga mamamayan. Ang mga mahahabang baybaying dagat ng Marinduque ay dinarayo
ng mga turista maging mga dayuhan man o local, ito ay isang industriya kung
saan ay nakikitang isang potential ng lalawigan upang mai-angat ang turismo at
madagdagan ang kita ng mga pamahalaang local.
Ang Moriones Festival
ng Marinduque ay isang tanyag na pagdiriwang at ito ay ginaganap sa tuwing
ipinagdiriwang ang Mahal na Araw. Ang mga pagdiriwang ng pista sa mga barangay
at mga bayan-bayan sa lalawigan ng Marinduque ay tunay na makukulay at ito ay
bahagi ng kultura at tradisyon ng mga Marinduquenos.
Sa kasalukuyang
kalagayan ng lalawigan, ang isa sa pinakapangunahing suliranin ay ang tungkol
sa elektripikasyon. Sapagkat umaasa sa power barge at sa pagbibigay ng supply
ng NAPOCOR, madalas ang pagkakaroon ng power failure at ito ay nagiging sanhi
ng pagkakaparalisa ng mga negosyo na gumagamit ng kuryente.
Ang pananalasa ng mga
bagyo sa lalawigan ay nagdulot din ng mga kapinsalaan sa agrikultura at sa
kabuhayan ng mga mamamayan, lalo’t higit ay ang bagyo ng mga taong 2006 at 2009
at muli itong naulit nuong 2012 kung saan ay nagdeklara ang lalawigan na ito ay
nasa ilalim ng “state of calamity”.
Ang mga pagbabago sa
lalawigan ay tinatayang magpapatuloy at ito ay sa pisikal na anyo nito. Sa
taong 2020 ay lalo pang uunlad ang ekonomiya ng lalawigan at ito sa pagtitiwala
ng mga magtatayo ng negosyo sa lalawigan lalo’t higit ay yaong may mga
kaugnayan sa turismo at sa paggamit ng mga bagong teknolohiya.
Ang Marinduque State
College na Marinduque State University na ay lalo pang uunlad sa pagbibigay ng
edukasyon sa mga mag-aaral ng Marinduque. Magkakaroon ng “ tourism boom” at
higit pang makikilala ang lalawigan. Gayundin sa paglalakbay, ang mga sasakyang
pandagat na nagbibiyahe sa lalawigan ay mas higit na magiging makabago upang
maitawid ang mga kalakal at produkto ng lalawigan.
Ang elektripikasyon ng
lalawigan kung hindi maililipat ang pamamahala at hindi mababago ang paraan ng
pagpapadaloy ng kuryente ay ganito pa rin ang magiging kalagayan, maaari pa
itong lumala at maaaring ito ay humantong sa mga usaping legal. Hindi pa rin
pahihintulutan ang muling pagmimina sa lalawigan at ito ay tuwirang pipigilan
ng mga mamamayan.
Sa taong 2020 ang
Marinduque ay lalong uunlad sa aspeto ng turismo, sa pagbibigay ng serbisyo sa
edukasyon, sa pagpapa-unlad ng mga inprastraktura, mga pagsasaayos ng mga farm
to market roads, at mga paraan ng paglalakbay. Mas magiging makasaysayan ang
ikalawang dekada ng ika-21ng siglo para sa lalawigan ng Marinduque lalo na sa
larangan ng pulitika.
Maraming mga bagong
pulitiko ang sisibol sa lalawigan at magdudulot ito ng shift sa larangan ng
pulitika. Mananatili ang kultura at tradisyon at magpapatuloy ang pagpapahalaga
sa mga pamana ng lahi. Magkakaroon ng mga panibagong pagtuklas sa pagpapa-unlad
ng agrikultura at ito ang pagtutuunan ng pansin ng Marinduque State University.
Maraming mga programa ang ilulunsad bunsod ng mga pagbabago sa pananaliksik at sa
paglalapat ng mga teknolohiya.
Sa kabuuan ang
Marinduque ay magkakaroon ng pag-unlad sa pisikal na anyo subalit mananatili
ang mga tradisyon at kultura ng mamamayan. Ang turismo ang magiging pangunahing
industriya na magbibigay ng dagdag na kita ng lalawigan at ng mga bayan-bayan.- Jezelle B. Magsino, BSN - 1
0 comments:
Post a Comment